හඳපාන්ගොඩ ග්‍රාම නිලධාරිනියට උපහාර

රැකියා කරන අය ඕනෑ තරම් දැකිය හැකි වුණත් එම රැකියාවෙන් විශ්‍රාම යන විට ජනතා උපහාරයට ලක්වන අය දැකගත හැක්කේ කලාතුරකිනි. තම රැකියාව හරි හැටි ඉටුකරන අයට උපහාර පිදීමට ජනතාව කිසි විටෙක මැලි වන්නේ නැතැයි ඉංගිරිය සාසනාරක්ෂක බල මණ්ඩලයේ සභාපති හඳපාන්ගොඩ ගණේ විහාරාධිපති කොටිගල ධම්මරතන හිමියෝ පැවසූහ. ධම්මරතන හිමියෝ ‍එසේ පැවසූවේ වසර 22ක කාලයකින් පසු විශ්‍රාම ලද 620ඒ හඳපාන්ගොඩ ග්‍රාම නිලධාරිනී ජී.ඩී. ලීලා පද්මිණී මහත්මියට උපහාර දැක්වීම සඳහා හඳපාන්ගොඩ ගණේ විහාරස්ථානයේදී පැවැති උත්සව සභාවක විශේෂ අනුශාසනාවත් කරමිනි. හඳපාන්ගොඩ සිවිල් ආරක්ෂක කමිටුව හා හඳපාන්ගොඩ ගම්වාසීන් විසින් මෙම උත්සවය සංවිධානය කරනු ලැබීය. ධම්මරතන හිමියෝ මෙසේ පැවසූහ. “රාජකාරියත්, මිනිස්කමත් එකට කැප කරමින් රජයත්, ජනතාවත් අතර‍ට මැදිවී ජනතා සේවයක් ඉටු කිරීමෙන් මෙම ග්‍රාම නිලධාරිනිය කළ සේවය මෙසේ ප්‍රදේශවාසීන් අගය කිරීම අන් රජයේ සේවකයන්ටද ආදර්ශයක්. ඉංගිරිය ප්‍රාදේශීය ලේකම් චම්පා උපසේන මහත්මිය මෙසේ පැවසුවාය. “ආයතනයක නිලධාරීන්ගෙන් ලබන උපහාරයට වඩා ගමේ ජනතාවගෙන් ලබන උපහාරය ඉතා වැදගත්, එය ජනතා හදවත් තුළින් පැන නගින අව්‍යාජ උපහාරයක් බැවැන් එය මිල කළ නොහැකියි. වසර 22ක් එකම කොට්ඨාසයක සේවය කරන්නට කෙනෙකු‍ට ලැබෙන්නේ එම තැනැත්තා‍කගේ සේවය ගමේ අය අගය කරන නිසයි.”මෙම ග්‍රාම නිලධාරීන්ගේ සේවා කාලය තුල ඇයට එරෙහි කිසිදු විරෝධතාවයක් හෝ ‍පැමිණිල්ලක් ජනතාවගෙන් ලැබී නැති බවද ප්‍රාදේශීය ලේකම්වරිය පැවසුවාය. ඉංගිරිය පොලිස් ස්ථානාධිපති උදය කුමාර මහතා මෙහිදී මෙසේ පැවසීය. “වසර 22ක් එකම කොට්ඨාසයක සේවය කිරීමට ලැබීමද මෙම ග්‍රාම නිලධාරිනිය ලද උපහාරයක්. සේවයෙන් විශ්‍රාම ලද විට තමන් කළ සේවය පිළිබඳ ආපසු හැරී බලා ඉන් අස්වැසිල්ලක් තෘප්තියක් ලද හැකිනම් එයට වඩා සතුටක් එම විශ්‍රාමිකයාට තවත් නැහැ.” ඉංගිරිය සහකාර ප්‍රාදේශීය ලේකම් සමන්තිකා පී. ලියනගේ, විශ්‍රාමික විදුහල්පති මාලනී හපුතන්ත්‍රී,ග්‍රාම නිලධාරී වයි.ජී. දයාරත්න යන මහත්ම මහත්මීන් ඇතුළු කිහිප දෙනෙක්ම මෙහිදී කතා කළහ.